سانحہ ماڈل ٹائون میں گرفتار ہونیوالے سابق ایس ایچ او سبزہ زار سمیت 10کے قریب تھانیداروں اوراہلکاروں کے اہل خانہ کی عیدالفطر کے موقع پر مالی امداد کیلئے پولیس کے 15انسپکٹرز اور سب انسپکٹرز نے اپنی مدد آپ کے تحت فنڈز کولیکشن کمیٹی بناتے ہوئے چندہ جمع کرنا شروع کر دیا۔
فیکٹ کو ذرائع سے معلوم ہوا ہے کہ گزشتہ سال ہونیوالے سانحہ ماڈل ٹائون میں ہونیوالی ہلاکتوں کا ذمہ دار قرار دے کر سابق ایس ایچ او سبزہ زار انسپکٹر عامر سلیم، ایلیٹ فورس کے سب انسپکٹر رئوف، اطہر، ہیڈ کانسٹیبل جاوید، محسن، عمران، خرم اور شجاعت کو گرفتار کر لیا گیا تھا جس کے بعد اس وقت کے پولیس افسران نے ان تھانیداروں اور اہلکاروں کی رہائی کیلئے بڑے بڑے دعوے کیے تھے جبکہ ایک ایس پی نے اس مقدمے کو لڑنے کیلئے نامور وکلاء کو بھی ہائر کیا تھا تاہم وقت گزرنے کے ساتھ ساتھ اس واقعہ کی از سر نوجوائٹ تحقیقاتی ٹیم نے انکوائری کی جس میں انہوں نے ان اہلکاروں اور ایس پی سکیورٹی کو اس تمام واقعہ کا ذمہ دار ٹھہرادیا تھا جس کے بعد وہ ایس پی تو منظر عام سے غائب ہو گیا اور ان تمام اہلکاروں کو جیل پہنچا دیا گیا تھا جہاں اب ان کے مقدمے کا ٹرائل چل رہا ہے۔
یہاں یہ امر قابل ذکر ہے کہ محکمہ پولیس کی جانب سے بھی اب ان تھانیداروں اور اہلکاروں کا کوئی پرسان حال نہیں ہے، اس صورتحال کو دیکھتے ہوئے لاہور پولیس کے چند انسپکٹرز اور سب انسپکٹرز نے اپنی مدد آپ کے تحت ان گرفتار پولیس افسران اور اہلکاروں کے اہلخانہ کو عید الفطر کے موقع پر مالی امداد کرنے کیلئے فنڈز کولیکشن کمیٹی تشکیل دیتے ہوئے تمام پولیس افسران اور اہلکاروں سے چندہ اکٹھا کرنا شروع کر دیا ہیں، اس حوالے سے اس تھانیدار نے اپنا نام صیغہ راز میں رکھتے ہوئے بتایا کہ عامر سلیم اور دیگر اہلکاروں کا مقدمہ تو عدالت میں چل رہا ہے، اعلیٰ  افسران نے تو ان بیچاروں کی کوئی مدد نہیں کی مگر ہماری یہ کوشش ہو گی کہ ان کی رہائی تک ہم ان کے اہلخانہ کا جہاں تک ہو سکے خیال رکھے گا۔

لاہور: فیکٹ رپورٹنگ ڈیسک