کتنی دولت ہے؟کتنا خرچ کیا ؟کتنا ٹیکس جمع کرایا؟

لاہور/ایم ارشد
پاکستان تحریک انصاف کے سربراہ عمران خان کے اثاثوں اور گوشواروں سے متعلق تفصیلات منظر عام پر آ گئیں، عمران خان نے سال 2011ء کے دوران محض سوا 3 لاکھ روپے کا ٹیکس جمع کرایا جو پچھلے سال کے مقابلے میں 15 لاکھ روپے کم ہے جبکہ قابل ٹیکس آمدنی صرف 5 لاکھ 46 ہزار 620 روپے ظاہر کی گئی ہی، عمران خان نے گھریلو اور ذاتی اخراجات 66 لاکھ 7 ہزار 170 روپے بتائی، اسلام آباد میں 2مکان ظاہر کیے ہیں جس میں سے ایک کی مالیت ظاہر نہیں کی گئی، غیر ملکی اکاونٹس میں ایک لاکھ 83 ہزار 201 ڈالر، ایک ہزار 230 پاونڈز اور 92 ہزار 62 یورو شامل ہیں، 50 لاکھ کی پراڈو، 825 کنال کی زرعی زمین کے بھی مالک ہیں، عمران خان کی طرف سے اپنے بچوں کے نام کوئی جائیداد اور اثاثے ظاہر نہیں کیے گئے۔
ذرائع کے مطابق عمران خان کی جانب سے جو انکم ٹیکس اس سال جمع کروایا گیا ہے اس کے مطابق عمران خان نے گھر میں استعمال ہونے والی بجلی کے بلوں کی ادائیگی کی مد میں مجموعی طور پر 2 لاکھ 89 ہزار 37 روپے خرچ کیے جبکہ اسلام آباد گھر میں زیر استعمال ٹیلی فون اور انٹرنیٹ بلوں کی ادائیگی کی مد میں 91 ہزار 400 روپے خرچ کیے۔ گیس کے بلوں کی مد میں 25 ہزار روپی، سیکورٹی سروسز، پانی کے بل، فائر انشورنس، گراونڈ رینٹ سمیت دیگر مد میں مجموعی طور پر 11 ہزار 149 روپے خرچ کیے ہیں۔ عمران خان نے 2011ء میں اندرون و بیرون ملک سفر پر 5لاکھ روپے خرچ کیے۔ عمران خان نے اسلام آباد کے علاوہ دوسرے متفرق، ذاتی اور گھریلو اخراجات کی مد میں 25 لاکھ 40 ہزار 584 روپے کے اخراجات ظاہر کیے ہیں۔ انکم ٹیکس گوشوارے میں عمران خان کی طرف سے بچوں کی تعلیم پر اخراجات کی مد میں کوئی رقم ظاہر نہیں کی گئی اور نہ ہی کلب ممبر شپ فیس کی مد میں کوئی اخراجات ظاہر کیے گئے ہیں۔ عمران خان کی جانب سے 2010ء کے گوشوارے میں قابل ٹیکس آمدنی 82 لاکھ 62 ہزار 898 روپے ظاہر کی گئی تھی جو کہ عمران خان کی طرف سے 2011ء میں 77 لاکھ 16 ہزار 278روپے کی کمی کے ساتھ صرف 5 لاکھ 46 ہزار 600روپے ظاہر کی گئی ہے۔ عمران خان کی جانب سے 2010ء میں جمع کرائے جانے والے انکم ٹیکس گوشوارے میں زرعی آمدنی ساڑھے 7لاکھ روپے ظاہر کی گئی جو 2011ء4 کے انکم ٹیکس گوشوارے میں 15 لاکھ 80 ہزار روپے اضافہ کے ساتھ 23 لاکھ 30 ہزارروپے ظاہر کی گئی ہے۔ 2010ء کے انکم ٹیکس گوشوارے کے ساتھ جمع کروائی جانے والی ویلتھ اسٹیٹمنٹ میں وراثت میں ملنے والی جائداد میں مکان نمبر 2 زمان پارک لاہور، میانوالی میں 2لاکھ کا مکان، موضع رنگیالی بہالیاں فیروز والا، شیخوپورہ میں 163 کنال زمین، گدالہ بھکر میں شیخ ڈگر شیخ میں 141 کنال زمین، بھکر کی چک نمبر 30 الف میں 8 ایکڑ زمین، بھکر میں ڈگر 30 کنال زمین، بھکر کے چک نمبر 185 میں 60 کنال زرعی زمین اور موضع ڈنگیال بھکر میں 170 کنال زمین ظاہر کی گئی ہے اس کے علاوہ عمران خان کی طرف سے ویلتھ اسٹیٹمنٹ میں بتایا گیا ہے کہ انہیں اسلام آباد کے علاقے موہرہ نور میں واقع 300 کنال 5 مرلے کا مکان تحفے میں ملا ہے۔ عمران خان کی طرف سے غیر ملکی اکاونٹس کی تفصیلات میں بتایا گیا ہے کہ بینک الفلاح بلیو ایریا اسلام آباد میں ایک اکاونٹ میں 2870474 میں 1230 پاونڈ بینک الفلاح بلیو ایریا اسلام آباد میں دوسرے اکاونٹ نمبر 02801880 میں ایک لاکھ 81 ہزار 728 ڈالرز ہیں جبکہ بینک الفلاح بلیو ایریا اسلام آباد ہی میں تیسرے اکاونٹ نمبر 02865506 میں 92 ہزار 62 یورو جبکہ اسی بینک کے چوتھے اکاونٹ نمبر 01801070 میں ایک ہزار 473 ڈالر موجود ہیں۔ تاہم ویلتھ اسٹیٹمنٹ میں عمران خان کی طرف سے اپنے بچوں کے نام کوئی جائداد اور اثاثے ظاہر نہیں کیے گئے۔ عمران خان کی طرف سے ویلتھ اسٹیٹمنٹ میں اپنے اثاثہ جات کی مجموعی مالیت 3 کروڑ 94 لاکھ 12 ہزار 312 روپے ظاہر کی گئی ہے۔