کرپشن سے دوراورسماجی خدمات میں سب سے آگےعمران کےاچانک سیاست کےمنظرنامہ پرممکنہ وزیراعظم بن کرابھرنا بڑی تبدیلی کا اشارہ ہے ، جس کا عوام بے صبری سے انتظار کر ینگے

فیکٹ رپورٹ
پکار رہا ہے پاکستان
عمران ……….. عمران……….. عمران
بچاکو عمران،بھنور سے نکالو عمران، مسیحا بن جاؤ عمران ، جان ومال کے محافظ بن جاؤ عمران ، وقار کا ضامن بن جاؤ ، عمران مقدر سنواردو، عمران، دنیا بدل دو عمران
مگر یہ صدائیں کرکٹ کے مداحوں کی ہیں اور نہ کرکٹ کے میدان سے ہیں ، جہاں کبھی عمران خان کے باؤنسر ار چھکے حریفوں کو چت کیا کرتے تھے ، جہاں عمران خان کا جلال ہی پاکستان کا وقار تھا، بلکہ یہ صدائیں تو سیاست کے میدان سے آرہی ہیں، یہ عوام کے نعرے ہیں، یہ عوام کی خواہش ہے ، یہ عوام عام کا خواب ہے، جو روایتی سیاستدانوں سے بیزار ہوچکے ہیں، اکتا گئے ہیں اور پریشان ہیں، وہ پناہ مانگ رہے ہیں، بدعنوان سیاستدانوں سے جاگیرداروں سے اور امریکا نواز حکمرانوں سے ، وہ چاہتے ہیں کہ ایک صاف ستھری ساکھ کا مالک لیڈر، جوایماندار ہو، صاف گو، حقیقت پسند، بھروسہ مند، پروقار، بین الاقوای برادری میں قابل قبول ہو اور اب ان کی نظر میں ایسا صرف ایک انسان ہے جو عمران خان ہے ‘ جس کے ساتھ پاکستان ہے۔ مذہبی ہوں یا سیکولر شدت پسند ہو یا اعتدال پسند، امریکا نواز ہوں یا امریکا مخالف ، سب سے اہم بات کہ وہ فوج کی پسند ہے،کیونکہ وہ سیاست میں ہمیشہ مثبت نظریہ کے ساتھ رہا ہے، مگر سیاسی دنگل میں داؤ پیچ میں کمزور ثابت ہونے کے سبب اب تک اقتدار سے دور تھا۔
مگر اب حالات بدل رہے ہیں، عمران خان نے سیاست کے میدان میں بڑے قدم اٹھانے شروع کئے ہیں ۔وہ جوڑ توڑ کی سیاست کو سمجھ کر اب بڑے سیاسی دیو کو بونا بنانے کو تیار ہیں۔ عمران خان کی جماعت تحریک انصاف نے کراچی پورٹ کے سامنے نیٹو افواج کی افغانستان سپلائی کو روکنے کیلئے دھرنا دیا، تو تقریبا8ہزار افراد دھرنے میں شامل ہوئے تھے ۔ عمران خان کا حکومت سے مطالبہ ہے کہ پاکستان اب افغانستان کے نام پر امریکا کی مدد کرنا بند کردے ۔اس دھرنے کی سب سے قابل غور بات یہ تھی کہ اس احتجاجی پروگرام میں ہر طبقے اور سیاسی سوچ کے لوگوں نے شرکت کی تھی۔ سیاسی کارکنوں کے ساتھ مذہبی پارٹیوں کے حامی تھے۔ سنی تحریک کے حامی بھی دھرنے میں شامل ہوئے۔ دھرنے کے دوران مثبت بات یہ رہی کہ نیٹو افواج کی سپلائی میں تاخیر تو ہوئی مگر ایک بات یقینی بن گئی کہ عمران خان کا سیاسی مستقبل روشن ہے۔ یہ تبد یلی یکم مئی کو اسلام آباد کے قریب القاعدہ کے سربراہ اسامہ بن لادن کی ہلاکت کے بعد آئی ہے۔ ایک جانب حکومت اور شدت پسندوں کے درمیان تکرار اور ٹکراؤ جاری تھا، تو دوسری جانب فوج اور آئی ایس آئی کے ساتھ سیاسی جماعتوں کے اختلافات سڑکوں پر آگئے اور اب حالات ایسے ہیں کہ پاکستان میں فوج کی نظر میں عمران خان ہی سب سے موزوں سیاسی متبادل بن کر ابھر رہے ہیں۔ عمران خان اب بدلے ماحول میں لنگو ٹ کس چکے ہیں ، جو زرداری حکومت کیلئے ایک نئی للکار بن گئے ہیں۔
اسامہ کی موت اور۔۔۔۔۔۔۔
دلچسپ بات تو یہ ہے کہ اسامہ کی ہاکت کے بعد جہاں پاکستانی فوج اور سیاسی جماعتوں کے درمیان تعلقات میں تناؤ آرہاہے اور دونوں داخلی سلامتی کیلئے ایک دوسرے پر الزامات عائد کرے رہے ہیں، اس ٹکراؤ کے ماحول میں عمران خان واحد سفید پوش ہیں جو عوام کے ساتھ فوج کیلئے بھی قابل قبول ہیں۔ دراصل تحریک انصاف پارٹی کے پرچم تلے عمران خان نے جو موقف اختیار کیا ہے، جس حکمت عملی کو اپنایا ہے یا جس زبان کااستعمال کیا ہے ، اس نے سابق کرکٹر کو سب کی پسند بنادیا ہے۔ تجزیہ کاروں کا کہنا ہے کہ انتخاب کے میدان میں عمران خان خواہ مارکھا رہے ہوں ، مگر اب سیاسی اتھل پتھل کے دوران لگ رہا ہے کہ آنے والے دنوں میں پاکستان ایک اور عمران کا دیدار کرے گا، کیونکہ اس وقت عمران خان جو زبان استعمال کر رہے ہیں ، وہ فوج کی پسندہے۔ وہ اچھے طالبان اور برے طالبان پر یقین رکھتے ہیں ۔ وہ امریکا کے خلاف ہیں۔ ڈرون حملوں پر امریکا پر سخت تنقید کرچکے ہیں۔ وہ ایک جانب قومی سیاسی جماعتوں پر نشانہ لگارہے ہیں ، ان کی پالیسیوں اور فیصلوں کو للکارہے ہیں اور دوسری جانب مذہبی جماعتوں کے ساتھ تعلقات کو دوستانہ بنارہے ہیں۔ دراصل عمران خا ن ، جن کا دماغ کرکٹ کی دنیا میں بے جوڑ تھا، جن کے دماغ نے کرکٹ کی دنیا میں پاکستان کو بادشاہت دلائی تھی ۔ اب پاکستانی سیاست کے چالبازوں کو چت کرنے کیلئے سیاسی باؤنسر پھینک رہے ہیں ۔ فوج اور قومی سیاسی جماعتوں کے درمیان ٹکراؤ نے عمران خان کو ایک درمیانی راستہ دے دیا ہے، وہ فوجی اور مذہبی گروپوں کے ساتھ تال میل اور توازن بنا کر چلنا چاہتے ہیں، وہ مذہبی گروپوں اور فوج کے خلاف بڑبولے بن کا استعمال نہیں کررہے، بلکہ اس کے برعکس پاکستانی لیڈران کے تیور مختلف ہیں۔ نواز شریف کے ساتھ مزید کئی لیڈران نے کہا ہے کہ داخلی سلامتی کیلئے فوج کو جواب دہ ہونا چاہئے۔ نواز شریف کے خلاف صدر آصف علی زرداری نے مورچہ کھول دیا ہے ۔ وہ کہتے ہیں کہ نواز شریف غیر ذمہ داری سے کام لے رہے ہیں، ان کی بیان بازی سے فوج میں بغاوت پیدا ہوگی اور شدت پسند عناصر کو طاقت ملے گی، مگر ساتھ ہی زرداری وزیراعظم کیلئے مزید اختیارات اور پارلیمنٹ کی بالادستی کیلئے آواز بلند کررہے ہیں۔
کرنا ہوگا انتظار…….
اپوزیشن جماعتیں عید کے بعد ایک بڑا مورچہ قائم کرنے والی ہے، جس کے سبب ملک میں سیاسی درجہ حرارت بڑھ جائے گا۔ ان حالات میں عمران خان کیا کریں گے ، یہ آنے والے وقت میں معلوم ہوگا، مگراتنا ضرور ہے کہ اب عمران خان کی سیاست نے انگڑائی لے لی ہے۔ وہ پاکستانی سیاست کے سمندر کی گہرائی ناپ چکے ہیں۔ ان کو اس بات کا احساس ہے کہ وہ پاکستانی سیاست میں اگر قدم جماتے ہیں تو فوج اور مذہبی گروپوں کے ساتھ تال میل رکھنا ہوگا۔ فوج کے سامنے یہ مسئلہ ہوگا کہ اپوزیشن کی بڑی تحریک کو کس طرح کمزور کیا جائے، جبکہ آئی ایس آئی آئی اس معاملے میں فوج کے ساتھ ہوگی۔ اگر زرداری حکومت پو کوئی آفت آئی تو فوج ہی آگے آئے گی ۔ ایسا 2009 میں ہوچکا ہے۔ جب نواز شریف کے ملک گیر مارچ نے ملک کو ٹھپ کر دیا تھا، اپوزیشن نے چیف جسٹس کو دوبارہ بحال کرنے کا مطالبہ کیا تھا، ا سکی حمایت میں عدلیہ کی ہڑتال نے پاکستان کو ٹھپ کردیا تھا۔ اور عوام سڑکوں پر آگئے تھے ۔ زرداری حکومت نے ان مطالبات کو تسلیم کیا تو معلوم ہوا کہ اس مین فوجی سربراہ جنرل پرویز مشرف کیانی کا اہم کردار تھا۔ اب اگر ایسے حالات پید ہوئے اور فوج کے تیءں اپوزیشن اور پی پی پی کا رویہ یکساں رہا تو عمران خا ن ریزرو امیدوار کی حیثیت سے سامنے آسکتے ہیں۔ ایک ایسے سیاستدان جو دائیں بازو کو بھی قبول اور بائیں بازور کو بھی ۔ اگر سیاسی طاقتیں کسی سمجھوتے پر نہیں پہنچ سکیں تو عمران خان بن سکتے ہیں ملک کے وزیر اعظم اور اگر ایسا ہوا تو یہ پاکستانی تاریخ میں ا یک سنہرا باب ہوگا، کیونکہ عمران خان کی سب سے بڑی خوبی یہ ہے کہ وہ صاف ستھرے کردار اور ساکھ کے مالک ہیں۔ بدعنوانیوں سے دور ہیں، سماجی خدمات میں سب سے آگے ہیں، ان کو شوکت خانم کینسر اسپتال اس کی مثال ہے ۔ پاکستانی عوام عمران خان سے کم سے کم یہ توقع کر سکتے ہیں کہ وہ بدعنوانیوں کے خلاف ہونگے، تعلیم پر زور دیں گے ، ہتھیاروں کی تہذیب کو ختم کرینگے اور جمہو ریت کا ذائقہ محسوس کرائیں گے۔ عمران خان کے اچانک پاکستانی سیاست کے منظر نامہ پر ممکنہ وزیراعظم بن کر ابھرنا بڑی تبدیلی کا اشارہ ہے ، جس کیلئے پاکستانی عوام بے صبری سے انتظار کر ینگے۔