شامی نے جنرل ظہیر السلام کی جگہ نیا ڈی جی آئی ایس مقرر کرنے کا مطالبہ کیا تو میاں عامر محمود کو معاملے کی سنگینی کا احساس ہو گیا اور انہوں نے فوری ایکشن لیا ، شامی کو جیو ٹی وی نے اپنے پروگرام میں بلا لیا

ملک کے معروف صحافی اور روزنامہ پاکستان کے چیف ایڈیٹر مجیب الرحمان شامی کو دنیا ٹی وی پر ’’ بین ‘‘ کر دیا گیا ہے اور ان کے کسی بھی پروگرام میں آنے پر فی الحال پابندی لگا دی گئی ہے ۔یہ معاملہ اس وقت سامنے آیا جب مجیب الرحمان شامی نے کامران شاہد کے ایک پروگرام میں وزیر اعظم نواز شریف سے ڈی جی آئی ایس آئی جنرل ظہیر السلام عباسی کی جگہ نیا ڈی جی آئی ایس آئی لگانے کا مطالبہ کر دیا ۔کچھ اسی طرح کا مطالبہ کچھ عرصہ قبل جیو ٹی وی کے ایک صحافی کی طرف سے بھی کیا گیا تھا ۔یاد رہے کہ جیو ٹی وی کی سزا ابھی تک ختم نہیں ہوئی ۔
دنیا ٹی وی کے مالک میاں عامر محمود معاملے کی سنگینی کو محسوس کرتے ہوئے فوری طور پر حرکت میں آئے اور انہوں نے آئی ایس آئی کے سربراہ کے بارے میں ریمارکس پر ایکشن لیتے ہوئے مجیب الرحمان شامی کو دنیا ٹی وی پر بین کر دیا ۔
اس موقع پر جیو ٹی وی مجیب الرحمان شامی کی مدد کے لئے آگے آیا اور جیوٹی وی کی طرف سے مجیب الرحمان شامی کو اپنے چینل پر مدعو کیا گیا ۔ جیو ٹی وی کی اینکر عائشہ بخش کے ایک پروگرام میں مجیب الرحمان شامی سامنے آئے اور اپنے خیالات کا اظہار کیا ۔
مجیب الرحمان شامی نے اینکر کامران شاہد کے پروگرام میں دلائل دیتے ہوئے کہا تھا کہ جاوید ہاشمی کے انکشافات اور فوج پر لگنے والے الزامات کے بعد آئی ایس آئی کے سربراہ جنرل ظہیر السلام کی جگہ نواز شریف نیا ڈی جی آئی ایس آئی مقرر کر دیں جو ان کی جگہ لے ۔ نئے ڈی جی آئی ایس آئی کا تقرر کر دیا جائے ۔ جنرل ظہیر السلام کے دو ماہ رہ گئے ہیں اور اس لئے مناسب ہو گا کہ نیا ڈی جی آئی ایس آئی مقرر کر دیا جائے۔ کامران شاہد نے اس موقع پر ان سے سوال پوچھا کہ آپ یہ مطالبہ کر رہے ہیں تو مجیب الرحمان شامی نے کہا تھا کہ یہ میرا مطالبہ بھی ہے اور یہ میری تجویز بھی ہے اور میری خواہش بھی ہے ۔
کچھ اسی طرح کا مطالبہ حامد میر پر حملے کے بعد جیو ٹی وی کے ایک پروگرام میں ایک اور صحافی انصار عباسی نے کیا تھا جس پر خاصی تنقید ہوئی تھی ۔ جیو ٹی وی کی مشکلات میں اضافے کی ایک وجہ ان کے صحافیوں کے آئی ایس آئی کے بارے میں اس طرح کے ریمارکس بھی تھے ۔ صورتحال کی سنگینی کو دنیا ٹی وی کے مالک میاں عامر محمود محسوس کر گئے اور انہوں نے اس پر فوری ایکشن لیا ۔ جس کے بعد مجیب الرحمان شامی دنیا ٹی وی پر نظر نہیں آئے ۔اس طرح مجیب الرحمان شا می کو آئی ایس آئی کے سربراہ کو تبدیل کرنے یا ان کی جگہ فوری طور پر نیا ڈی جی آئی ایس آئی مقرر کرنے کا مطالبہ مہنگا پڑ گیا ۔
ذرائع نے بتایا کہ وزیر اعظم میاں محمد نواز شریف نے چند دن پہلے جب مجیب الرحمان شامی کی بہن کی وفات پر تعزیت کے لئے لاہور میں ان کے گھر آئے تھے تو اسی وقت مجیب الرحمان شامی اور نواز شریف میں بہت سے معاملات پر گفتگو ہوئی تھی جن میں نواز شریف کی طرف سے اس طرح کے معاملات بھی ڈسکس کئے گئے تھے کہ کیسے فوج کی اعلیٰ ترین قیادت حکومت کے لئے مشکلات پیدا کر رہی ہے اور عمران خان اور ڈاکٹر طاہر القادری کے دھرنوں کے پیچھے انہی فوجی کمانڈروں کا ہاتھ ہے۔ ذرائع کے مطابق نواز شریف نے اس موقع پر ان سات کور کمانڈروں کے نام بھی بتائے تھے جو ان کی حکومت کے لئے مشکلات پیدا کر رہے ہیں ۔یہ سات کور کمانڈر آج سے چند سال قبل پرویز مشرف کے قریبی ساتھیوں میں شمار ہوتے تھے ۔ ذرائع کے مطابق اس موقع پر مجیب الرحمان شامی نے نواز شریف کو اپنی مکمل حمایت کا یقین دلایا تھا ۔اس کا عملی مظاہرہ وہ دنیا ٹی وی کے پروگرام میں اکثر کرتے رہے اور اس بات کو خاص طور پر محسوس کیا گیا کہ مجیب الرحمان شامی صرف نواز شریف کو سپورٹ کرنے کیلئے دنیا ٹی وی کا پلیٹ فارم استعما ل کر رہے ہیں ۔ تاہم دنیا ٹی وی انتظامیہ کی طرف سے اس بات کو بھی نظر انداز کیا گیا لیکن ڈی جی آئی ایس آئی کی تعیناتی کے بارے میں ان کی خواہش اور مطالبے کو انتظامیہ کی طرف سے نظر انداز نہیں کیا گیا اور ان پر پابندی لگا دی گئی ۔

رپورٹ : مقبول ارشد