محترم قائدِانقلاب شیخ الاسلام ڈاکٹر محمد طاہرا لقادری صاحب مدظلہ العالی
بانی و سرپرست اعلیٰ تحریک منہاج القرآن و پاکستان عوامی تحریک
السلام علیکم ورحمۃ اللہ و برکاتہ
اللہ پاک آپ کہ صحت وسلامتی کے ساتھ عمر خضر عطافرمائے اور آپ کے ہاتھوں مصطفوی انقلاب اس دھرتی کا مقدر کردے۔میں عرصہ 22 سال سے تحریک منہاج القرآن کا رفیق اور آپ کا کارکن ہوں۔اس طویل رفاقت میں تحریک کے ہر مرحلہ انقلاب میں پوری لگن،جذبے اور استقامت کے ساتھ شامل رہا۔پہلا لانگ مارچ اور دھرنا جنوری 2013 ء اور اگست 2014 ء کے لانگ مارچ اور دھرنے میں از اول تا آخر پوری فیملی کے ساتھ شامل رہا۔اس امید کے ساتھ کہ آپ کی قیادت میں مصطفوی انقلاب اس دھرتی کا مقدر بنے گا۔مگر بدقسمتی سے ہم اپنے مقاصد میں کامیاب نہ ہوسکے لیکن جدوجہد کو جاری رکھے ہوئے ہیں۔میں نے کئی بار اپنی گذارشات اور خدشات آپ کی خدمت تک پہنچانے کی سنجیدہ کوششیں کیں مگر وہ کوششیں کامیابی سے ہمکنار نہ ہوسکیں جس کی وجہ آپ کی جانب سے مقرر کردہ وہ قائدین ہیں جو گذشتہ 15,20 سال سے اہم اور اعلیٰ تحریکی عہدوں پر براجمان ہوکر تحریک کے سیاہ وسفید کے مالک بنے بیٹھے ہیں۔یہی وہ قائدین ہیں جو قائد اور کارکن کے درمیان دیوارچین کی طرح بڑی رکاوٹ بنے ہوئے ہیں جس کی وجہ سے فیلڈ کے اصل حقائق اور کارکنوں کے جذبات آپ تک نہیں پہنچ پاتے۔لہذا مجبور ہوکر پاکستان کے آزاد میڈیاکا سہارا لینا پڑا ہے تاکہ یہ چند سوالات جو ایک سچے کارکن کے دل کی آواز ہے آپ تک پہنچ سکیں اور آپ اپنے ارد گرد موجود چند خوشامدی رہنماؤں سے ہٹ کر عام کارکن کی آواز بھی سن سکیں۔
حضور قائد محترم!
دنیا کی تاریخ کے طویل ترین دھرنے کی ناکامی کے بعد جب 27 اکتوبر 2014 ء کو آپ مجلس شوریٰ کے اجلاس میں تشریف لائے تو آپ کو کارکنان کے شدید ردعمل کا سامنا کرنا پڑا جس پر آپ نے اپنی مصروفیات کینسل کرکے کارکنوں کی بات سننے پر آمادگی ظاہر کی۔پھر جب آپ نے کارکنوں کو کہا کہ اپنے سوال لکھ کر اپنے مرکزی قائدین کو جمع کروا دیں جن کے جوابات میں خود دوں گا توآپ نے دیکھا کہ پورا ہال اس بات پر متفق تھا کہ یہی سارے قائدین دھرنے میں ناکامی کی بڑی وجہ ہیں،ہمیں ان پر کوئی اعتماد نہیں ہے لہذا ہم اپنے سوالات ان کے ہاتھوں میں نہیں دینا چاہتے۔اس شدید ردعمل کودیکھتے ہوئے آپ نے فرمایا کہ آپ خود اپنے نمائندے بنا کر سوالات جمع کریں جن کے جوابات میں دوں گا۔اس پر کارکنان خواتین و حضرات وہ سوالات آپ تک پہنچانے پر رضامند ہوئے۔آپ نے اس اجلاس میں چند سوالات کے جوابات عنائت فرما ئے اور ساتھ ہی یہ بتایا کہ میں باقی سوالات کے جوابات 2 نومبر2014 ء کو منہاج ٹی وی پر بذریعہ ویڈیو لنک دوں گا۔ساتھ ہی یہ بھی فرمایا کہ مرکزی قائدین کے بارے میں آپ کے تحفظات میں اچھی طرح جانتا ہوں لہذا ایسا کوئی لیڈر مرکز پر نہیں رہے گا جسے کارکن نہ پسند کریں،اس کیلئے جنوری 2015 ء میں میلاد کانفرنس کے بعد انتخابات کروائے جائیں گے جس میں آپ اپنی مرضی کے قائدین کا انتخاب عمل میں لاسکیں گے۔2 نومبر2014ء کو آپ نے اپنے طویل ترین خطاب میں کارکنان کے تمام سوالات کے جوابات مرحمت فرمائے جس سے کارکنان کی تسلی ہوئی اور آپ نے اعلان فرمایا کہ اب ہر کارکن ووٹ کے زریعے اپنے مرکزی قائدین کو منتخب کرسکے گا۔اس پر کارکنان نے انتخابات کی تیاری شروع کردی مگر 2 بار الیکشن کی تاریخ تبدیل کرکے تیسری بار محض نامزدگیوں کو بنیاد بنا کر موجودہ قائدین کو ہی برقرار رکھنے کا اعلان فرما دیا اور ساتھ ہی یہ اعلان بھی فرمایا کہ جو شخص اس فیصلے سے اختلات کرے گا وہ کسی اور تحریک کو جوائن کرلے جس پر دل برداشتہ ہوکر بہت سے ایسے کارکنان نے تحریک کو خیر آباد کہہ دیا جن کی سالہا سال کی قربانیاں اس مشن کیلئے مثال تھیں۔7 اپریل 2015 ء کے آپ کے خطاب کے بعد کارکنان کے زہن میں بہت سے سوالات اٹھتے ہیں جن کے جوابات دینا آپ کا فرض اور کارکن کا حق ہے۔
سوال نمبر1۔ 27 اکتوبر کو جن مرکزی قائدین پر پوری مجلس شوریٰ نے عدم اعتماد اور شدید تحفظات کا اظہار کیا تھا آپ نے بغیر الیکشن کے انہی لوگوں کو ایک بار پھرکیوں کارکنان کے سروں پر مسلط فرمادیا جو کہ مسلسل 15,20 سالوں سے ان عہدوں پر براجمان ہیں؟
سوال نمبر2 ۔ کیا ملک میں انقلاب کی بات کرنے والی جماعت اپنے اندر قیادت کی تبدیلی کے ساتھ انقلاب لانے کو تیار نہیں ہے جبکہ واضح ہوچکا ہے کہ تحریک کی ناکامی کی وجہ یہی قائدین ہیں؟
سوال نمبر 3 ۔ ملک میں انقلاب کی بات کرنے والی جماعت کیا اپنے کارکن سے اتنی خوفزدہ ہے کہ وہ اپنے کارکن کو ووٹ کا حق بھی نہیں دے سکتی؟
سوال نمبر4 ۔ اگر دوبارہ وہی پرانے لوگ ہی اپنی ذمہ داریوں پر آنے تھے تو پھر چار ماہ انتخابات کا ڈرامہ کیوں رچایا گیا؟
سوال نمبر5 ۔ آپ نے اپنے 7 اپریل کے خطاب میں فرمایا کہ پورے پاکستان سے سب سے زیادہ نامزدگیاں انہی قائدین کی آئی ہیں لہذا انہی کو دوبارہ ان کی ذمہ داریوں پر فائز کیا جاتا ہے۔کیا دنیا میں کسی ایک جگہ بھی ایسی مثال موجود ہے کہ محض نامزدگیوں پر ہی فیصلہ کردیا جائے اور الیکشن کی نوبت ہی نہ آئے؟ کیا نامزدگی کو تمام کارکنان کا فیصلہ قرار دینا ناانصافی اور دھاندلی نہیں ؟
سوال نمبر6 ۔ کیا پوری تحریک میں کوئی ایک شخص بھی ایسا نہیں جو ڈاکٹر رحیق احمد عباسی،خرم نواز گنڈا پور،شیخ زاہد فیاض،احمد نواز انجم،ساجد بھٹی ،جواد حامداور دیگر موجودہ قائدین کی جگہ لے سکے؟
سوال نمبر7 ۔ کیا ہم آپ کے 7 اپریل کے فیصلے سے یہ سمجھ لیں کہ اسلام کی نشاۃ ثانیہ اور احیائے دین کا علم لے کر اٹھنے والی تحریک قحط الرجال کا شکار ہوچکی ہے؟
سوال نمبر8 ۔ کیا آپ کے اس فیصلے سے اختلاف کرنا اتنا بڑا جرم ہے کہ جس کی پاداش میں کارکن کی سالہا سال کی جدوجہد اور قربانیوں کو پس پشت ڈال کر اسے تحریک چھوڑنے کا حکم دے دیا جائے؟ کیا یہ آمریت اور غیر جمہوری طرز عمل نہیں ہے؟
سوال نمبر9 ۔ آپ نے اپنے 7 اپریل کے خطاب میں موجودہ قائدین کی تعریف کرتے ہوئے ان کی کوالیفیکیشن یہ بتائی کہ یہ لوگ دوسرے ملکوں میں کاروبار کرتے ہیں اور تحریک کیلئے اپنے گھر بار چھوڑ کر مرکز پر ذمہ داریاں ادا کررہے ہیں۔کیا مرکزی عہدوں کیلئے دوسرے ملک سے تعلق ہونا ضروری ہے،اور کیا پاکستان میں بسنے والا ایک عام غریب کارکن جو اعلی تعلیم یافتہ اور قائدانہ صلاحتیوں کا اہل ہو وہ ان عہدوں پر فائز نہیں ہوسکتا؟
سوال نمبر10 ۔ آپ نے فرمایا کہ اب کوئی الیکشن کا خیال بھی اپنے ذہن میں نہ لائے۔کیا اس کا مطلب یہ لے لیا جائے کہ موجودہ عہدیداران کو تاحیات ان کے عہدوں پر فائز کردیا گیا ہے اور یہ جو بھی گل کھلائیں ان کو دنیا کی کوئی طاقت ان کی ذمہ داریوں سے نہیں ہٹا سکتی؟
سوال نمبر11 ۔ 27 اکتوبر2014 ء کو کارکنان نے جو سوالات آپ کو جمع کروائے تھے ان میں موجودہ مرکزی قائدین پرکرپشن کے سنگین الزامات بھی عائد کئے جن کی توضیح آپ نے یہ کی کہ کرپشن نہیں ہوئی مگر مالی بے ظابطگیاں ہوئیں ہیں۔کیا ملک میں انتخاب سے پہلے احتساب کا نعرہ لگانے لگانے والی جماعت کے قائدین اپنے آپ کو کارکنوں کے سامنے احتساب کیلئے پیش نہیں کرسکتے؟جبکہ ان پر کرپشن کے ثبوت بھی کارکنان کے پاس موجود ہیں۔
سوال نمبر 12 ۔ اگر پاکستان عوامی تحریک ملکی مروجہ نظام میں رہ کر قومی سطح کی سیاست کرنا چاہتی ہے تو کیا یہ ضروری نہیں کہ اس کی مرکزی کابینہ میں سندھ،بلوچستان،خیبر پختونخواہ اور آزاد کشمیر کی بھی نمائندگی ہو؟
سوال نمبر13 ۔ کیا مرکزی عہدوں پر سالہا سال سے فائز موجودہ قائدین اتنے باصلاحیت،تعلیم یافتہ اور وژنری لوگ ہیں کہ ان کے مقابلے میں پورے ملک سے ایک بھی قابل شخصیت نامز د نہیں ہوسکی؟
سوال نمبر14 ۔ کیا جموریت اس بات کا نام ہے کہ جو اختلاف رائے کرے اسے غدار قرار دے کر تحریک سے خارج کردیا جائے؟
سوال نمبر 15 ۔ کیاآپ اپنا دس نکاتی انقلابی ایجنڈا اپنی تحریک میں نافذ کرکے اسے پورے ملک کیلئے قابل تقلید مثال بنائیں گے تاکہ ایک عام کارکن بھی تحریکی وسائل سے بہرہ یاب ہوسکے؟
سوال نمبر16 ۔ کیا وہ تمام تر خرابیاں جن کا ذکر ہم اپنے ملکی نظام میں کرتے ہیں،تحریکی نظام کے اندر بھی موجود نہیں ہیں؟
سوال نمبر17 ۔ کیا یہ سچ نہیں ہے کہ تحریک کے اندر ایک مخصوص طبقہ(اشرافیہ) ہی تحریک کے تمام تر اختیارات اور وسائل پر قابض ہے جبکہ عام کارکن اپنا پیٹ کاٹ کر تحریک کیلئے فنڈ مہیا کرتا ہے اور وہ اشرافیہ ان وسائل کا بے دریغ استعمال کرتا ہے؟
سوال نمبر18 ۔ کیا تحریک میں بھی عام کارکن اور سرمایہ دار کے درمیان امتیازی سلوک روا نہیں رکھا جاتا؟
سوال نمبر19 ۔ کیا آپ سمجھتے ہیں کہ تحریک کی موجودہ قیادت مروجہ سیاسی نظام میں رہ کر ملکی سیاست میں کامیابی حاصل کرسکے گی؟ جبکہ آپ خود فرماتے ہیں کہ مروجہ انتخابی سیاست Winnig Hourses کی ہے،کیا ہمارے مرکزی قائدین کسی ایک وارڈ سے بلدیاتی الیکشن میں کونسلر بھی منتخب ہوسکتے ہیں؟
سوال نمبر20 ۔ کارکنان کے تمام تر احتجاج اور شدید تحفظات کے باوجود جب آپ نے ایک مرتبہ پھرانہی قائدین کو ان کے عہدوں پر فائز کردیا ہے تو کیا اس سے یہ ثابت نہیں ہوا کہ کارکن جھوٹے تھے اور موجودہ قائدین سچے تھے کیونکہ یہ تو پہلے دن سے ہی یہ کہ رہے تھے کہ ہمیں اپنی کرسیوں سے کوئی نہیں ہٹا سکتا؟
سوال نمبر21 ۔ کیا ایک عام کارکن یہ سوال کرنے میں حق بجانب نہیں ہے کہ ہمارا ’’غیر سرکاری سطح پر چلنے والا دنیا کا سب سے بڑا تعلیمی منصوبہ ‘‘ کس کے مفادات کی نذر ہوا اور کس کی غفلت کی وجہ سے قوم اتنے بڑے تعلیمی منصوبے سے مستفید نہیں ہوسکی؟
سوال نمبر22 ۔ آپ کو جھوٹی رپورٹس بھجوا کر انقلاب مارچ جیسا بڑا اقدام کروانے والے قائدین کیا اس قابل ہیں کہ وہ مسلسل ان کرسیوں پر فائز رہیں؟
سوال نمبر23 ۔ کیا عام کارکن یہ سمجھے کہ وہ کبھی بھی مرکزی قیادت کی ذمہ داریوں تک نہیں پہنچ سکتا؟
سوال نمبر24 ۔ کیا صاحبزادگان کو فیلڈ میں گئے بغیر وہ تجربہ اور تحریکی سمجھ بوجھ حاصل ہے کہ جس بناء پر وہ پوری تحریک کا نظام چلا سکیں؟
سوال نمبر25 ۔ جب الیکشن کا اعلان ہوا تو اس کیلئے کچھ کوالیفیکیشنز بھی متعین کی گئیں ،جن میں مرکزی ذمہ داران کیلئے ماسٹر ڈگری کا حامل ہونا ضروری تھا، کیا عرصہ دراز سے مرکزی ناظم اعلیٰ اور صدر PAT جیسے اہم عہدوں پر فائز رہنے والے شیخ زاہد فیاض صاحب کے پاس کسی مستند ادارے سے گریجویشن یا ماسٹر ڈگری موجود ہے؟
جناب قائدِ محترم! گستاخی کی معافی چاہتے ہوئے یہ سوالات پاکستان کے میڈیا کے زریعے آپ کی خدمت میں ارسال کررہا ہوں،اس امید کے ساتھ کہ آپ بہت ہی پیار اور شفقت کے ساتھ ان کے جوابات عنائت فرمائیں گے اور اگر ان سوالات میں کوئی اچھی تجویز پائیں تو تحریکی نظام میں بہتری بھی لائیں گے،اور صرف یس مین قائدین کی بجائے فیلڈ سے اعلیٰ تعلیم یافتہ،محنتی اور سیاسی سوجھ بوجھ رکھنے والے کارکنان کو آگے لاکر تحریک کے درخشاں مستقبل کی اچھی بنیاد رکھیں گے۔
والسلام
آپ کا ادنیٰ کارکن
غلام مصطفےٰ سکنہ علی پور چٹھہ ضلع گوجرانوالہ