ار جمند حسین وی وی آئی پی کلچر کے خلاف بلند آواز بن گیا ، مسافروں کوبتایا کہ یہ جہاز چار ممبر اسمبلی و سینٹ کی وجہ سے تاخیر کاشکار ہو رہا ہے ، جس پر مسافر مشتعل ہو گئے ۔

سینیٹر رحمٰن ملک کو پی آئی اے کے جہاز کو لیٹ کرنے کی پاداش میں مسافروں نے سزا دی اور انہیں بے عزت کر کے جہاز سے اتار دیاگیا۔ اس تما م واقعے کی ویڈیو پوری دنیا میں دیکھی گئی ہے لیکن آپ یقیناً یہ جاننا چاہیں گے کہ جہاز میں اس مہم کا آغاز کس نے کیاتو ہم آپ کو بتاتے ہیں کہ یہ بہادر انسان ار جمند حسین ہیں جنہوں نے نا صرف اس تمام واقعے کی ویڈیو بنائی بلکہ نہایت ہمت وبہادری سے جہاز کے مسافروں کو اپنے ساتھ ہونے والی زیادتی سے بھی آگاہ کیا۔ارجمند حسین نے مسافروں کوبتایا کہ یہ جہاز چار ممبر اسمبلی و سینٹ کی وجہ سے تاخیر کاشکار ہو رہا ہے گو کہ پی آئی اے کے طیارے کو فنی خرابی کاسامنا تھا لیکن یہ فنی خرابی دور ہونے کے بعد بھی جہاز کو لیٹ کیا گیاتاکہ اراکین اسمبلی آجائیں اور پھر جہاز روانہ ہو۔
ارجمند حسین نے تما م مسافروں کو اس بات پر تیار کیا کہ جب رحمٰن ملک اور دیگر ممبران آئیں گے تو ان سے معافی کا مطالبہ کریں گے لیکن جب رحمٰن ملک آئے تو لوگوں کا غصہ انتہا کو پہنچ چکا تھا اور انہوں نے رحمٰن ملک کو جہاز میں بیٹھنے کی اجازت نہ دی۔ارجمند حسین پرل کانٹینل ہوٹل میں ملازمت کرتے ہیں۔
عوامی اور سماجی حلقوں میں ارجمند حسین کی بہادری کو خراج تحسین پیش کیا جا رہا ہے اور کہا جا رہا ہے کہ انہوں نے بہت اچھا کام کیا ۔ پوری قوم کو اب اس وی وی آئی پی کلچر کے خلاف بیدا ر ہونا چاہیے اور سیاست دانوں کو یہ باور کرانا چاہیے کہ وہ حقیقی معنوں میں عوام کے خادم بنیں۔
لاہور/رپورٹ :وسیم شیخ