اسلام آباد /سٹاف رپورٹ
پاکستان کے بالائی پنجاب کے علاقے پنڈ دادن خان کے پیرچنبل پہاڑوں میں شدت پسندوں کی کارروائی میں جاں بحق ہونے والی ملٹری انٹیلی جنس کے چار اہلکاروں کے قتل کی ابتدائی تفتیش سے یہ بات سامنے آئی ہے کہ حملہ آوروں کے پاس ان اہلکاروں کی علاقے میں موجودگی کی پیشگی اطلاع تھی۔ پاکستانی فوج کے اعلیٰ ترین انٹیلی جنس ادارے کے ذمہ داران اس اطلاع کے سامنے آنے پر تشویش کا شکار ہیں کہ ایک انتہائی خفیہ مشن کی اطلاع کس طرح شدت پسندوں تک پہنچ گئی۔ میجر آفاق کی سربراہی میں ایم آئی کی چار رکنی ٹیم گیارہ نومبر کو پنڈ دادن خان کے پہاڑی علاقے پیر چنبل میں فوج کو مطلوب ایک شدت پسند رہنما کے ٹھکانے کے بارے میں معلومات حاصل کرنے یا جاسوسی کے مشن پر تھی۔ فوجی ذرائع کے مطابق اس معاملے کی ابتدائی تفتیش میں یہ بات سامنے آئی ہے کہ جس طرح سے اس ٹیم پر گھات لگا کر حملہ کیا گیا اس سے پتہ چلتا ہے کہ حملہ آوروں کے پاس اس ٹیم کی علاقے میں موجودگی کے بارے میں تمام اطلاعات موجود تھی۔ واضح رہے کہ یہ افسران جاسوسی مشن پر تھے اور کسی بھی بڑی کارروائی کے لئے ان کے پاس اسلحہ اور افراد موجود نہیں تھے۔ فوجی روایت کے مطابق اس جاسوسی مشن کی اطلاع انٹیلی جنس ایجنسی کے علاوہ باہر کے کسی ادارے کو نہیں دی گئی تھیں۔ اس کا بالواسطہ مطلب یہ ہے کہ ایجنسی کے اندر سے کسی نے یہ اطلاع حملہ آوروں کو فراہم کی تھی۔