وفاقی حکومت نے44 ہزار827افراد کو مختلف الزامات کے تحت بلیک لسٹ قرار دیتے ہوئے ان کی سرگرمیوں کی نگرانی کی ہدایت کردی جبکہ10 ہزار افراد کے قبائلی علاقوں میں داخلے اور بیرون ملک جانے پر پابندی عائد کر دی گئی، پابندی کی زد میں آنے والے افراد کی فہرست میں صوبہ خیبر پختونخوا اور ملحقہ قبائلی علاقوں کے 10 ہزار افراد بھی شامل ہیں جن میں2ہزار افراد کے نام منفی سرگرمیوں کی وجہ سے فہرست میں شامل کیے گئے اور ان کے نام ایگزٹ کنٹرول لسٹ میں بھی شامل ہیں۔پیرکو جرمن خبررساں ادارے ’’وائس آف جرمنی ‘‘کی رپورٹ کے مطابق پابندی کی زد میں آنے والوں میں زیادہ تر کالعدم جہادی تنظیموں سے وابستہ افراد، ان کے ساتھ روابط رکھنے اور مبینہ طور پر مالی معاونت کرنے والوں سمیت فرقہ پرستی میں مبینہ طور پر ملوث افراد بھی شامل ہیں۔ ان افراد میں جہاں بہت سے پاکستان کو مختلف تخریبی کارروائیوں میں مطلوب ہیں وہاں ان میں سے ایک بڑی تعداد امریکا اور مغربی ممالک کو بھی مطلوب ہے۔بلیک لسٹ قرار دیے جانے والے افراد میں پاکستانیوں کے علاوہ 3 ہزار سے زائد افغان باشندوں سمیت افریقی اور کئی دیگر ممالک کے باشندے شامل ہیں۔