اسلام آباد/سٹاف رپورٹ
امریکا میں متعین پاکستانی سفیر حسین حقانی نے روزنامہ نوائے وقت کی جانب سے اپنے اداریے میں خود کو امریکی شہری بتائے جانے پر اخبار کے خلاف ہتک عزت کا نوٹس بھجوا دیا ہے۔ حسین حقانی کے وکیل اختر اعوان ایڈووکیٹ کی جانب سے بھجوائے جانے والے نوٹس میں بتایا گیا ہے کہ 26/ ستمبر 2011ء کو نوائے وقت نے ایک توہین آمیز آرٹیکل شائع کیا جس میں دعویٰ کیا گیا کہ حسین حقانی کے پاس پاکستان کے علاوہ امریکی شہریت بھی ہے اور وہ ’’پاکستان بیزار‘‘ ہیں۔ نوٹس میں کہا گیا ہے کہ آرٹیکل توہین آمیز ہے اور جان بوجھ کر اس میں جھوٹ کو پھیلانے کی کوشش کی گئی ہے تاکہ سفیر کو بدنام کیا جا سکے۔ حسین حقانی کے وکیل کے مطابق بے بنیاد الزامات کی وجہ سے ان کے موکل کی ساکھ مجروح ہوئی ہے۔ نوٹس میں کہا گیا ہے کہ حسین حقانی نے کبھی امریکی شہریت کے حصول کی کوشش کی اور نہ ہی ان کے پاس کسی دوسرے ملک کی شہریت ہے۔ نوٹس میں کالم نویس، اخبار کے ایڈیٹر ان چیف اور پرنٹر و پبلشر سے کہا گیا ہے کہ وہ نوٹس کے موصول ہونے کے 14/ روز کے اندر اخبار میں مناسب جگہ پر معافی نامہ شائع کریں بصورت دیگر ان کے خلاف عدالتی چارہ جوئی عمل میں لائی جائے گی اور ایک ارب روپے ہرجانے کا دعویٰ دائر کیا جائے گا۔