سٹا ف رپورٹ
پنجاب کے مقتول گورنر سلمان تاثیر کے بیٹے شہباز تاثیر کی رہائی کیلئے اغوا کاروں نے 2 ارب روپے تاوان مانگ لیا ، اغواء کاروں کی جانب سے مغوی کے اہل خانہ سے رابطہ کرنے کے بعد حساس اداروں نے تفتیش کا دائرہ کار بڑھا دیا۔ اغوا کاروں نے اہلخانہ کو متنبہ کیا ہے کہ اگر وہ بیٹے کی زندگی چاہتے ہیں اور اس کی بازیابی چاہتے ہیں تو 2 ارب روپے کا فوری بندوبست کیا جائے جس پر اہلخانہ نے اغوا کاروں سے کہا کہ ہمارے پاس اتنی رقم نہیں ہے اور شہباز تاثیر سے بات کرانے کا مطالبہ کیا جس پر اغواء کاروں نے کہا کہ رقم کا بندوبست ہونے پربات کروادی جائے گی۔ ذرائع کے مطابق حساس اداروں نے مغوی کے اہلخانہ کو کی جانے والی ٹیلیفون کال کا ریکارڈ بھی حاصل کرلیا ہے۔ ذرائع نے بتایا ہے کہ شہباز تاثیر کے اہلخانہ کو ٹیلیفون کال خیبر پختونخوا سے کی گئی ہے۔ دوسری جانب شہباز تاثیر کے بھائی شہریار تاثیر نے اغوا کاروں کی جانب سے رابطے کرنے کی خبر کو بے بنیاد قرار دیتے ہوئے کہا ہے کہ شہباز تاثیر کی رہائی کیلئے اغوا کاروں نے ابھی تک ان سے کوئی رابطہ نہیں کیا۔