تاثیر کے خاندان کو ایک عرصے سے شدت پسندوں کی جانب سے دھمکیاں موصول ہو رہی تھیں

سابق گورنرپنجاب سلمان تاثیر کے بیٹے شہباز تاثیر کو اغواء کر لیا گیا ہے۔ عینی شاہدین نے بتایا ہے کہ اغوا کاروں نے شہباز تاثیر کی گاڑی کو حسین چوک کے قریب روکنے کے بعد اْنھیں زبردستی اپنی گاڑی میں بیٹھا کر ساتھ لے گئے۔سلمان تاثیر کے قتل کے بعد اْن کے اہل خانہ کو حکومت نے سکیورٹی فراہم کر رکھی ہے تاہم شہباز تاثیر کو جب اغواء کیا گیا تو اْن کے ساتھ کوئی محافظ نہیں تھا۔ پولیس حکام کا کہنا ہے اْنھیں شہباز تاثیر کی گاڑی سے اْن کے موبائل فون اور دیگر اشیاء ملی ہیں۔ صوبائی دارالحکومت میں رواں ماہ کے دوران اہم شخصیات کے اغوا کی یہ دوسری واردات ہے۔ اس سے قبل 13 اگست کو نامعلوم مسلح افراد کے ایک گروپ نے ترقیاتی اْمور کے امریکی ماہر ڈاکٹر وارن وائنس ٹائن کو ماڈل ٹاؤن میں اْن کی رہائش گاہ سے اغوا کیا تھا۔ وزیر اعظم یوسف رضا گیلانی نے شہباز تاثیر کے اغوا کی مذمت کرتے ہوئے اعلیٰ عہدے داروں کو ہدایت کی ہے کہ وہ مغوی کی بازیابی کے لیے صوبائی حکام کو ہرممکن مدد فراہم کریں۔ شہباز تاثیر کے اہل خانہ کا کہنا ہے کہ اْن کے خاندان کو شدت پسندوں کی جانب سے دھمکیاں موصول ہو رہی تھیں اور عین ممکن ہے کہ اس واردات میں بھی انہی عناصر کا ہاتھ ہو۔ یاد رھے کہ سلمان تاثیر کو 4 جنوری کو اْن کی حفاظت پر معمور پنجاب پولیس کے ایک اہلکار نے اسلام آباد میں گولیاں مار کر ہلاک کر دیا تھا۔ سابق گورنر کے قتل میں زیرحراست ملزم ممتاز قادری کا کہنا ہے کہ اْس نے سابق گورنرسلمان تاثیر کو ناموس رسالت ایکٹ میں ترمیم کے حق میں بیان دینے پر قتل کیا۔۔
سٹاف رپورٹ