شفافیت اور معلومات تک رسائی کیلئے منظور ہونے والے قانون کے باوجود بہت سے صوبائی محکمے اور ایجنسیاں لوگوں کو معلومات فراہم کرنے میں بری طرح ناکام رہی ہیں۔ تحقیقات کے دوران دی نیشن کو ایسے بہت سے واقعات کا علم ہوا جہاں درخواست گزاروں کو معلومات تک رسائی نہیں دی گئی۔ ہر معاملے میں شفافیت کا دعویٰ کرنے والی پنجاب حکومت کیلئے معلومات فراہمی کے حوالے سے انکار بہت بڑا سوالیہ نشان ہے۔ ایک شکایت کنندہ نے بتایا ایس اینڈ جی اے ڈی اور سی اینڈ ڈبلیو کے محکمے معلومات فراہمی میں ناکام ثابت ہو رہے ہیں۔ پنجاب میں کام کرنے والے دوہری شہریت کے حامل بیوروکریٹس اور ان کے اندرون و بیرون ملک اثاثوں کے حوالے سے ایس اینڈ جی اے ڈی نے معلومات نہیں دیں جبکہ سی اینڈ ڈبلیو نے اس حوالے سے معلومات فراہم کرنے سے انکار کر دیا۔ ایک اور شکایت کنندہ خالد خٹک نے بتایا کہ 5 ماہ گذرنے کے باوجود سیکرٹری سکولز نے پبلک سکولوں کو اپنانے کی پالیسی کے حوالے سے نہیں بتایا تھا۔ معلوم ہوا ہے کہ ایکٹ کی خلاف ورزی پر پہلی سزا ای ڈی او وہاڑی کو دی گئی ہے۔ انکوائری کی کاپی اور سنیارٹی لسٹ فراہم نہ کرنے پر صوبائی انفارمیشن کمشنر نے 2 ماہ کی تنخواہ کاٹنے اور انضباطی کارروائی کی سفارش کی۔ شکایت کنندہ طارق کے مطابق انفارمیشن کمشنر ذمہ داروں کو فوری سزا دیں ورنہ قانون بے فائدہ رہے گا۔

لاہور/رپورٹ: جاوید اقبال