بعض با اثر اور طاقتور ارکان اسمبلی نے ارکان اسمبلی اور تمام ٹیکس دہندگان کی ڈائریکٹر ی کے اجرا کو روکنے کی کوششیں تیز کردی ہیں۔ وزارت خزانہ نے بھی تاحال فیڈرل بورڈ آف ریونیو (ایف بی آر )کو احکامات جاری نہیں کیے جس سے شکوک و شبہات جنم لے رہے ہیں کہ شاید وفاقی حکومت ارکان اسمبلی اور ٹیکس دہندگان کی ٹیکس تفصیلات جاری کرنے میں سنجیدہ نہیں۔ ایف بی آر کے ذرائع کا کہنا ہے گزشتہ سال کی طرح اس سال بھی ارکان اسمبلی اور ٹیکس دہندگان کی ڈائریکٹری شائع کرنے کیلئے ایف بی آر کو کوئی اعتراض نہیں اور اس حوالے سے تیاری مکمل ہے مگر وزارت خزانہ سے تاحال احکامات موصول نہیں ہوئے۔ ٹیکس ڈائریکٹری جاری کرنے سے متعلق وزیر خزانہ نے تاحال کوئی اعلان کیا او رنہ ہی باقاعدہ طور پر ہدایات جاری کی گئیں ہیں۔ وزیر خزانہ سینیٹر اسحاق ڈار نے گزشتہ سال 6جنوری کو سینیٹ میں ٹیکس ڈائریکٹری جاری کرنے کا اعلا ن کیا تھا۔
اسلام آباد بیورو