پاکستان پیپلز پارٹی کی کرپشن کے کیچڑ میں لت پت حکومت ی عہدیداران کے جہاں بہت سے سکینڈل سامنے آ رہے ہیں وہاں بلوچستان کے وزیر اعلیٰ نواب اسلم رئیسانی کے’’ نہ جانے کہاں سے کمائے ہوئے‘‘ 25ارب روپوں کی ایک منی چینجر کے ذریعے منتقلی اور پھر اس کے رقم سمیت غائب ہوجانے کے سکینڈل نے ہلچل سی مچا دی ہے ۔ اگرچہ پاکستانی میڈیا اس بارے میں دم سادھے بیٹھا ہے لیکن سیاسی حلقوں میں اس وقت بلوچستان کے وزیر اعلیٰ نواب اسلم رئیسانی کے 25ارب روپوں کی گمشدگی کا معاملہ خاصا گرم ہے اور مختلف ذرائع اس بارے میں مختلف آ راء کا اظہار کر رہے ہیں۔ یہ معاملہ اس وقت سامنے آ یا تھا جب نواب اسلم رئیسانی نے بلوچستان کے ہی ایک منی چینجر کے ذریعے 25ارب روپت بیرون منتقل کرنے کے لئے اسے دےئے ۔ تاہم جب کئی روز گزرنے کے بعد رقم نہ پہنچی تو وزیر اعلیٰ کو تشویش ہوئی ۔ بعد ازاں پتہ چلا کہ منی چینجر 25ارب کی رقم لے کر بھاگ گیا ہے ۔ یہ اطلاع نواب اسلم رئیسانی پر بجلی بن کر گری اور انہوں نے صوبے کی ریاستی مشینری کو استعمال کیا لیکن کچھ نہ نکل سکا کیونکہ منی چینجر وزیر اعلیٰ کی دسترس سے بہت دور جا چکا تھا ۔کہا جا رہا ہے کہ وزیر اعلیٰ اتنی بڑی رقم کو بھولنے کو تیار نہیں ہیں تاہم منی چینجر کا اس بارے میں کچھ پتہ نہیں چل رہا ۔ ’’ فیکٹ ‘‘ نے اس بارے میں تفصیلات حاصل کرنے کی کوشش کی لیکن ایسا لگتا ہے کہ تمام ذرائع نے اپنے منی سی رکھے ہیں اور مصدقہ طور پر کوئی بھی کچھ بتانے کو تیار نہیں ہے۔
فیکٹ رپورٹ