اسلام آباد/وسیم شیخ
پاکستان ریلوے اس وقت تیزی سے خاتمے کی جانب گامزن ہے مگر اس محکمے کے وفاقی وزیر افغانستان اور چین میں پٹریاں بچھانے کے خواب سجائے بیٹھے ہیں۔قومی اسمبلی میں نکتہ اعتراض پر خطاب کرتے ہوئے وفاقی وزیر ریلوے غلام احمد بلور نے اعتراف کیا کہ اس وقت ملک میں ٹرینوں کی قلت ہے اور ٹرینیں بند ہو رہی ہیں تاہم وفاقی وزیر کا کہنا تھا کہ چین اورافغانستان کے شہر جلال آباد تک ریلوے ٹریک بچھائیں گے اور وہاں تک ٹرین بھی چلائیں گے۔ زمینیں فروخت کرکے ریلوے کو نہیں چلا سکتی، اب تک 76 ٹرینیں بند کرچکے ہیں اور کوئی مال گاڑی بھی نہیں چل رہی۔انہوں نے بتایا کہ گزشتہ برس آنے والے سیلاب سے ریلوے کو 6 ارب جبکہ موجودہ سال کے سیلاب سے محکمے کو 24 کروڑ روپے کا نقصان ہوا۔علاوہ ازیں وزیراعظم یوسف رضا گیلانی نے بھی ریلوے پر نظر کرم کر لیا ہے اور انہوں نے اس کی بہتری کیلئے بعض احکامات بھی جاری کر دیے ہیں۔ریلوے امور سے متعلق وزیراعظم کو بریفنگ کے دوران سب اچھا ہے کہ رپورٹ پیش کی گئی اور انجنوں کی مرمت وغیرہ سمیت ٹرینوں کے چلانے کی رپورٹ دی گئی۔